Guarani-„Wanderung“ 2012 ins Emmental (by Kily dos)

Normalerweise wird ja der Reisebericht auf Hochdeutsch verfasst, aber auf Grund der Destination ist dieses Mal Berndeutsch angebracht. Darum wird aber dem nächsten Abschnitt der Sender von SWR3 auf Radio Emme umgestellt.

Äs het sich Folgendes zuedreit u basiert uf Tatsache, aber nid uf nackte!

Agfange hett ja das de scho chlei früecher i däm Jahr, wo dr El Presidente u dr Kily d’Uftrag vo de angere Guarani’s hei übercho, die hürigi Wanderig z’organisiere. Wüu ja das scho chlei äs cheibe Zügs isch u me für ds Organisiere de scho no sini Ruh brucht, hei doch die Zwö bschlosse, dass me die Wanderig schön i auer Ruh ds Koh Samui am Beach sött plane. Gesagt, getan si de die zwö dört häre gfloge u hei die Sach id Hang gno. Nach einigem Diskutiere u Drischagge hett me sich de gfunge u für ds Ämmital geinigt. Das wird ja de dä angerne wohl ou gfaue, hei sie gmeint. U zviu Loufe söu de glich nid unbedingt vorcho, schliesslech wöug me de doch ou ä chlei gmüetlech zäme höckle u si.

Wieder zrugg us dr Färni (hett de nüd ztüe mit Fahrni!) hett me sich de im Internet schlau gmacht. Aber so eifach isch de das äbe glich nid, wie mes gäng meint. Drum, die lo mache, wo druschöme. Also sofort dr Griff zum Hörer u de grad Ämmital-Tourismus aglüte. U das Frölein Aeschbacher hett nid nume sympathisch tönt, die isch de ou no sensationell guet druscho u hett üs äs ungloublechs Programm zämegsteut. Dr Kily wott de ihre gloub no persönlech uf Burgdorf go merci säge.

Item, im Ämmital hett sich de ömu schnäu die Mähr chunnt ta, dass de da äs paar Frömdi Ändi Ouguscht 2012 wei im Ämmital imarschiere. Scho dr Napoleon heigs versucht u sig sinerzyt dran gschitteret a dene herte Gringe. Drum hei sich de die Iheimische scho liecht druf vorbereitet.

Dr Tag isch de cho u ds schöne Wätter hett sich afo liecht verzieh. Dunkli Wueche sie über ds Tal zoge. Hett sich ächt de scho die grossi Angscht breit gmacht im Ämmital?

Bevor aber de die Guarani-Manne, sines Zeichens aues bestandeni Manne, i däm Ämmital si acho, hei sie ja no müesse die Reis aträtte. Deheime hei sie sich de mou i dr Krone ds Aarbärg troffe u hei dr Schlachtplan usgarbeitet.

Me munklet, dass nid jede Rucksack glich gross u schwär sig gsi – schiins. Item, dr Zug hett die Manne via Bärn uf Signau bracht. Dört isch me grad schaflig i erscht bescht Bus igstiege, wo sie de uf Eggiwil hett söue bringe. Chuem ume erscht Egge gfahre, si de scho die brune Güggeli a dr Stange ghanget u hei de die Manne migottsseu grad aglachet. Dr Schofför hett de was gisch was hesch Gas gä u isch de gar eilig näbe dene Güggeli düregfahre. Jze si sie no einisch drvocho, aber die Manne wärde de scho wieder einisch zruggcho u die Güggeli gnauer unger dLupe näh.

Im beschouliche Eggiwil isch me de usgstiege u dr Schofför isch de mit de angere Gäscht witers. Schiins heig me ja wöuä loufe u wandere vo Eggiwil übere hinger Ginsgrat zur Hohwacht nach Langnou. Aber dr Fragant isch drzwüschecho u plötzlech isch me de im Bäre ds Eggiwil ghocket. Eeeeeh, nume hurti u nume eis, schiins. Me munklet, dass äs de me als eis sig worde, aber äber si de doch nume Grücht.

Dr Bärewirt-Grossvater hett de bschlosse, siner zwö Rösser vore Charre zspanne u die Frömde uf das Langnou zfüehre. Aber zerscht isch de d’Serviertochter Manuela um üs ume gscharwänzelt u hett de gluegt, dass mir de doch immer gnue ztrinke hei. Aber äs isch de glich Zyt worde u dWueche über em Ämmital immer dunkler, de hei sie sich ufe Wäg gmacht, si uf dä Charre ghocket u dr Fuerme hett die Manne dr Ämme entlang gfahre. Sis Änkuching u dr Barry si de die ganzi Zyt vo Eggiwil uf Langnou tröii Wägbegleiter gsi.

Da stuunsch! Plötzlech si unger dä Bänk zwö Schatztruhe fürecho u me gloubts nid. Äs hett ds Trinke dinne gha. Eeeeeh, nume chlei Bier u Wy. Die Schatztruhene si de uf dere Fahrt haut glährt worde, isch ja ou dene beide Rösser ringer gange, we sie ufem Heiwäg nüme so viu hei müesse zieh.

Ds Langnou acho, hett me de mou dZimmer bezoge, nid wahr. Ds Einzuzimmer hett dr Presidänt für sich beansprucht u die angere hei sich guet ufteilt. Mir hei ömu de müesse feschtsteue, dass ä Strich i dr Landschaft definitiv nid ds Gliche isch, wie ä Strich im Gsicht. Eh guet, äs hett ja de scho gli im Guldige Löie zNacht gä. U das isch de wie fein gsi. Zerscht äs feins Blattsalätli mit Sonnebluemekärne. Anschliessend hetts de ä Rindsschmorbrate a rassiger Rotwysosse mit Härdöpfustock gä. Hmmmm das isch de fein. U uf aues uche de no, typisch Ämmitalerisch, ä Merängge mit Niidlä. Eh nu, ache hetts müesse. Da wärde de keiner Räschte gmacht.

Nach em Ässe sie de die gstangene Manne witerzoge. Zerscht hett me de scho gmeint, dass ds haube Ämmital im Seeland am Hornusserfescht sigi, aber im Roots hei mir de doch no Lüt atroffe. Unger angerem no ä Stanley-Cup-Sieger. Dr Tinu Gerber hett de gmüetlech eis gno. Mir hei de mou bsteut u eis trunke. Deu si de när mou Richtig Hotel hei u angere sie de ou Richtig…..aber eifach witers.

Egal ob das dr Falke in Aarberg oder ds Number One uf Koh Samui isch oder äbe ds Roots ds Langnau, äs git schiiins söttig, wo überau Fürabe mache, munklet me.

Eh nu, ä Gheimtipp sig de no d’Wöschmaschine, hetts gheisse. Ä Trupp isch de scho vorus dört häre ab, u ä Teu isch de noche cho. Wo de dr Kily ä Iheimische hett gfragt, wo de die Wöschchuchi sig, hett diesä nume gmeint, die heig är deheime…..Witer ghuefe hett de das ou nid. Aber mir heis ja de glich gfunge.

Dört ichecho, hei mir also grad gmeint, mir sig im Seeland. Wüü, äs isch üs grad Näbu entgägecho. Äs git söttig, wo säge, sig schiins besser so gsi, dass äs chlei Näbu heig gha. Me munklets.

Die Nacht isch ömu de ou düre u am nöchschte Morge isch de die Reis witergange. U eis müesst Dir no wüesse, dr Zug hei mir de no gäng verwütscht! Mir si de id Schoukäsi Affoltere go brönsche u hei üser Mäge bimene feine zMorge gfüehlt. Dusse hei mir de bis am Mittag uf Ross u Wage gwartet. Äs isch aber de scho langsam früsch worde, i däm Ämmital.

Schiins hei nümm au dr fittischt Idruck hingerloh, munklet me.

Vo Affoltere isch äs de mit Ross u Wage u em Fuerme uf Sumiswald gange. Mit däm Abschnitt isch de ou üsi diesjährigi Wanderig langsam aber sicher em Ändi zuegange. Ds Sumiswald si mir de i Zug igstiege u si de gäge spöter Sunntignomitag deheime acho.

Äs isch also luschtig gsi u mir hei viu glachet us heis sehr gmüetlech gha.

U aues angere, wo Dir chöret vo üsere Reis, isch de nume gmunklet, schiins!